Siç mund ta dini, më 04 Maj 2016 në ngjarjen teknologjike The Future of SharePoint, Microsoft prezantoi disponueshmërinë e përgjithshme të produktit MS SharePoint Server 2016 një aplikacion që mundëson menaxhimin e dokumenteve dhe të bashkëpunimit të biznesit. Si çdo prezantim tjetër i produkteve të Microsoft, natyrisht edhe ky i MS SharePoint Server 2016 ishte i shoqëruar nga vëmendja mediatike si dhe efekti magjepsës i Internetit. Ishte vetë drejtori gjeneral i Microsoft për SharePoint dhe OneDrive, Seth Patton, i cili zhvilloi fjalimin hyrës. Në mesin e risive të shumta që bartë në vete MS SharePoint Server 2016 vlenë të përmendet infrastruktura e frymëzuar në re, pajtueshmëria dhe raportimi, si dhe përvojat e shtuara të përdoruesit. Siç është bërë tashmë zakon, Microsoft përmes portalit Technet Evaluation Center ofron mundësinë e shkarkimit dhe të eksplorimit e risive të MS SharePoint Server 2016 për një periudhë të caktuar kohore, e që kryesisht është 180 ditë. Ndaj, në rreshtat në vijim do të ndaj me ju përvojën time në instalimin e MS SharePoint Server 2016.

Skedari për shkarkim i MS SharePoint Server 2016 ofrohet në formatin *.IMG. Pasi ta keni shkarkuar produktin MS SharePoint Server 2016 është në përzgjedhjen tuaj që skedarin e shkarkuar *.IMG ta shkruani në DVD ose ta përdorni në formatin origjinal për të proceduar me instalimin e MS SharePoint Server 2016. Para se të ecni tutje me instalimin e MS SharePoint Server 2016 është e domosdoshme që paraprakisht ta keni të instaluar MS SQL Server 2016 meqë bazat e konfigurimit dhe të përmbajtjes së MS SharePoint Server 2016 ruhen në MS SQL Server 2016. Më shumë informatë në lidhje me instalimin e MS SQL Server 2016 (nëse nuk e keni instaluar akoma) mund të gjeni në artikullin: SQL Server 2016: “Të dhënat janë energjia elektrike e re” dhe nga video prezantimi në YouTube: MS SQL Server 2016: Si ta instaloni? Nëse tashmë keni instaluar MS SQL Server 2016, atëherë hapeni skedarin *.IMG dhe përzgjidhni skedarin splash që të nisni procesin e instalimit të MS SharePoint Server 2016:

Në dritaren e hapur klikoni Install software prerequisites:

Klikoni butonin Next në dritaren Microsoft SharePoint 2016 Products Preparation Tool për të kontrolluar kompjuterin tuaj nëse i përmban parakushtet dhe përditësimet e duhura:

Përzgjidhni I accept the terms of the License Agreement(s) dhe klikoni butonin Next për të instaluar parakushtet dhe përditësimet në kompjuterin tuaj:

Ka nisur instalimi i parakushteve dhe përditësimeve:

Pas kompletimit të instalimit të parakushteve dhe përditësimeve, kompjuteri juaj duhet të riniset ndaj klikoni butonin Finish:

Në dispozicionin tuaj janë dy versionet e MS SharePoint Server 2016: Standard dhe Enterprise. Varësisht se për cilin version jeni përcaktuar shkruajeni çelësin e produktit të përzgjedhur në kutinë tekstuale të dritares së shfaqur:

Përzgjidhni I accept the terms of this agreement dhe klikoni butonin Continue për të vazhduar me instalimin e MS SharePoint Server 2016:

Në dritaren e shfaqur ndryshoni shtegun e lokacionit të instalimit të skedarëve të MS SharePoint Server 2016 në rast se një gjë të tillë dëshironi ta bëni. Në të kundërtën vazhdoni duke klikuar butonin Install Now:

Shiriti i progresit tregon instalimin e MS SharePoint Server 2016 në kompjuterin tuaj:

Dritarja e radhës tregon se ka përfunduar instalimi i MS SharePoint Server 2016 porse duhet vazhduar me ekspertin për konfigurim të produkteve të SharePoint. Ndaj në rast se nuk është i përzgjedhur (zakonisht është i përzgjedhur) opsioni Run the SharePoint Products Configuration Wizard now, atëherë përzgjidheni atë dhe klikoni butonin Close:

Klikoni butonin Next për të konfiguruar produktet e MS SharePoint Server 2016:

Dritarja e radhës ju alarmon për nisjen apo rivendosjen e shërbimeve të nevojshme për të ekzekutuar MS SharePoint Server 2016. Klikoni butonin Yes për aprovim:

Varësisht se a po bëni instalim të ri apo përmirësim të infrastrukturës ekzistuese, në dispozicionin tuaj janë dy opsione për fermën e serverëve. Në këtë rast, ne po përzgjedhim opsionin Create a new server farm dhe klikoni butonin Next:

 Në dritaren e radhës vendos parametrat e bazës së konfigurimit si dhe kredencialet për qasjen në këtë bazë të të dhënave (shënim: këto të dhëna duhet marrë nga MS SQL Server 2016 i instaluar paraprakisht). Kliko butonin Next:

Për ta siguruar fermën e serverëve vendos fjalëkalimin:

Në dritaren e radhës përzgjedh rolin e serverit të MS SharePoint Server 2016 në fermën e serverëve. Nëse në infrastrukturën tuaj nuk posedoni fermë të serverëve të shumëfishtë, atëherë përzgjidh opsionin Sigle-Server Farm dhe kliko butonin Next:

Nga numri 1 e deri në 65535 përzgjidh portin për SharePoint Central Administration Web Application. Në rast se nuk e keni përzgjedh një portë sipas dëshirës, atëherë eksperti do të përkujdeset që ta përzgjedh për ju. Përzgjedh opsionin e autentikimit dhe kliko butonin Next:

Duke klikuar në butonin Next, ju konfirmoni parametrat e listuar në dritaren e shfaqur si dhe e konkludoni instalimin e MS SharePoint Server 2016:

Ka nisur konfigurimi i produkteve të MS SharePoint Server 2016 i cili përbëhet nga një mori hapash të cilët duhet të kompletohen. Pra është një proces që merr një kohë të konsiderueshme për tu kompletuar, ndaj bëni mirë të shfaqni durim:

Eksperti përmes dritares në vijim konfirmon konfigurimin e suksesshëm. klikoni butonin Finish për të kompletuar instalimin e MS SharePoint Server 2016:

Ndihmesë të madhe në përpjekjet tuaja për të instaluar MS SharePoint Server 2016 do të ju ofron edhe video prezantimi nga YouTube SharePoint Server 2016: Si ta instaloni?:

Shpresoj që ky postim të jetë informues për ju të dashur lexues.

paqe dhe shëndet,

Bekimi

Bekim Dauti’s Blog | Bekim Dauti’s Vlog | e-Books @Amazon Kindle Store